बिर्तामोड असोज १३।। नेपालीहरूको महान चाड दशैं तिहार आउन अब केही समय मात्र बाँकी छ। दसैं तिहार नजिकिएसँगै सीमा क्षेत्रमा बसोबास गर्ने नेपालीहरु किनमेलका लागि ठूलो संख्यामा भारतीय बजारमा जान थालेका छन्।
झापाको मेची नगरपालिका र भद्रपुर नगरपालिका संग जोडिएको भारतीय बजारमा अहिले चाड पर्वका लागि आवश्यक सामग्री किन्न आउने नेपालीहरुको भीडभाड देखिन्छ। नेपाली बजारमा भन्दा सस्तो मूल्यमा सामान पाइने भएकाले भारतीय बजारको आकर्षण बढेको भारतीय बजार पानी ट्याङ्कीमा सामान किन्न आएका नेपालीहरू को भनाइ छ
किनमेल गर्न सीमावर्ती पानी ट्याङ्की बजार आएकी बिर्ता मोड ५ की बासिन्दा सोनाती चौधरीले सामान सस्तो पर्ने भएकाले भारतीय बजार आएको बताइन्। नजिकिँदै गरेको दशैंको लागि कपडा, श्रृंगारका र अन्य घरायसी सामग्रीहरु नेपाली बजारको तुलनामा भारतीय बजारमा सस्तो पर्छ।
त्यस्तै, अर्का स्थानीय बिनिता उप्रेती पनि नेपालको तुलनामा भारतीय बजारमा सबै सामानहरु सस्तो हुने गरेको बताइन ‘नेपालका बजारमा महँगो छ‚ पैसा नभएको वेलामा थोरै भए पनि बचत होला भनेर सबैजना यहाँ आउँछौँ‚’ उनले भनिन
झापाका बजारहरूमा दशैंको चहलपहल खासै देखिँदैन। व्यापारिक केन्द्रहरू बिर्तामोड, धुलाबारी चन्द्रगढी जस्ता बजारहरू सुनसान छन्। तर भारतीय बजारहरूमा चहलपहल बेग्लै छ। भारतीय बजार पानी पानी ट्याङ्की, नक्सल, गलगलिया पुग्दा साँच्चै दशैं आएको आभास हुन्छ। दशैंका लागि लत्ता कपडा र खाद्यान्न किन्नका लागि त्यहाँ पुगेका नेपालीहरूको भिड देखिन्छ। भारतीय बजारका व्यापारीहरुले पनि नेपाली उपभोक्तालाई उत्साहपूर्वक प्रतीक्षा गरेको देखिन्छ। भारतीय व्यापारी सुनिल अग्रहरीले अरु समयभन्दा चाड पर्व नजिकिएसँगै भीडभाड बढेको बताउँछन्।
नेपाल-भारत सीमा क्षेत्रमा रहेको भारतीय बजार पानी ट्याङ्कीमा नेपाली चाड पर्व दसैं तिहारलाई ध्यानमा राख्दै व्यापारीहरुले विशेष छुट र आकर्षक अफरहरु ल्याएका छन्। सीमा क्षेत्रमा बसोबास गर्ने नेपाली उपभोक्ताले यसलाई अवसरका रुपमा लिएका छन्।
झापा मोरङ सुनसरी इलाम पाँचथर लगायत जिल्लाबाट पनि चाडबाडको बेला सामान लिन यहाँ आउने गर्छन्।
दसैं तिहार पर्व नजिकिएसँगै नेपाली उपभोक्ताहरुको भारतीय बजारप्रतिको आकर्षण र सीमा क्षेत्रमा देखिएको चहलपहलले चाडबाडको रौनक अझ बढाएको छ। यता नेपाली बजारमा भने सोचेअनुरुप व्यापार नभएको व्यापारीहरु बताउँछन्।
