बर्दिया —
सशस्त्र प्रहरीले बर्दियामा ठूलो मात्राको अवैध विद्युतीय चुरोट (इलेक्ट्रिक भेप) नियन्त्रणमा लिएको छ ।
जिल्लाको मधुवन नगरपालिका–५, गाउँ नं. १० फुलाराम चोकबाट भारततर्फ तस्करी हुँदै गरेको ४८ लाख रुपैयाँ बराबरको १ हजार ९ सय २० थान विद्युतीय चुरोट सशस्त्र प्रहरी गस्ती टोलीले नियन्त्रणमा लिएको हो ।
सशस्त्र प्रहरी नायव निरीक्षक कमल बहादुर नेपालीको नेतृत्वमा खटिएको गस्ती टोलीले उक्त सामान नियन्त्रणमा लिएको कुरा सशस्त्र प्रहरी बल नेपाल नं. ३१ गण हे.क्वा.बर्दियाका सशस्त्र प्रहरी उपरीक्षक मान बहादुर शाहीले जानकारी गराउनुभयो ।
उहाँले ‘स्पेशम्यान एसपी चालिस हजार’ सो विद्युतीय चुरोटको नाम रहेको बताउँदै प्रति थान २ हजार ५ सय रुपैयाँ बजार मूल्य रहेको उल्लेख गर्नुभयो ।
सशस्त्र प्रहरी उपरीक्षक शाहीका अनुसार बरामद सामान आवश्यक कारबाहीका लागि राजापुर भन्सार कार्यालय गुलरिया पठाईएको छ । नेपाल–भारत खुला सिमानाका कारण यस्ता अवैध सामानहरूको तस्करी लगायतका क्रियाकलाप नियन्त्रण गर्न सशस्त्र प्रहरीले गस्ती कडाइ गरेको छ ।
विशेष सुराकीको आधारमा खटि गएका सशस्त्र प्रहरी टोलीलाई देख्नेबित्तिकै तस्करीमा संलग्न व्यक्तिहरू सामानसहितका दुई वटा साइकल छोडेर भारततर्फ फरार भएको बताइएको छ ।
