बाँके
दक्षिण कोरियाली संवैधानिक अदालतले सोमबार महाभियोग लगाइएका कार्यवाहक राष्ट्रपति हान डक सुलाई पदमा पुनर्बहाली गरेको छ। अन्तर्राष्ट्रिय समाचार संस्थाका अनुसार, संसद्ले महाभियोग लगाएको कार्यवाहक राष्ट्रपति हान डक सु अहिले पदमा फर्किएका हुन्।
गत डिसेम्बरमा सैनिक शासन लागू गर्ने प्रयास गरेपछि राष्ट्रपति युन सुक योललाई महाभियोग लगाइएको थियो। त्यसपछि, प्रधानमन्त्री रहेका हान डक सु कार्यवाहक राष्ट्रपति बनेका थिए। तर, राष्ट्रपति योलविरुद्धको महाभियोगको प्रक्रिया अदालतमा अघि बढाउन रोकेपछि उनलाई पनि संसद्ले महाभियोग लगाएको थियो।
सोमबार, संवैधानिक अदालतका बहुमत न्यायाधीशहरूले महाभियोग प्रस्ताव अस्वीकृत गरेपछि हान कार्यवाहक राष्ट्रपतिको जिम्मेवारीमा फर्किएका हुन्। अदालतले हानको पदमा पुनर्बहाली गरेपछि उनले धन्यवाद ज्ञापन गर्दै भने, “निलम्बनमा रहँदा मन्त्रीहरूले कडा मेहनत गरेका छन्, र अब हामी सँगै काम गरेर दक्षिण कोरियालाई विकासको मार्गमा अघि बढाउनेछौं।”
राष्ट्रपति युन सुक योलको महाभियोग भने अझै संवैधानिक अदालतमा विचाराधीन रहेको छ, र यसबारे निर्णय केही दिन भित्र आउने अपेक्षा गरिएको छ।
