काठमाडौं।
सिन्धुपाल्चोकको भोटेकोसी गाउँपालिका वडा नम्बर १ का ४३ वर्षीय किसान फुच्चे लामा पुनः पक्राउ परेका छन्। उनी ५ वर्ष पहिले सुन तस्करी प्रकरणमा जेल बसिसकेका थिए। यसपटक उनलाई रसुवा नाका हुँदै ट्रकमा युरो र अमेरिकन डलरसहितका विदेशी मुद्राहरू तस्करी गर्दै जाने क्रममा पक्राउ गरिएको हो।
काठमाडौँ उपत्यका अपराध अनुसन्धान कार्यालयको टोलीले विशेष सूचनाका आधारमा गएराति उनलाई पक्राउ गरेको हो। प्रहरीले पत्रकार सम्मेलनमार्फत जानकारी दिँदै भने कि, पक्राउ गरेको विदेशी मुद्रा नेपालीमा कन्भर्ट गर्दा २५ करोड १ लाख ६० हजार ३३८ रुपैयाँको बराबरी हुन्छ।
पक्राउ पर्ने लामा ट्रक नं. ना ७ ख १६५२ द्वारा केरुङतर्फ जाने क्रममा फल्स बटम बनाएर रकम लैजाँदै थिए। प्रारम्भिक अनुसन्धानका अनुसार, अर्का व्यक्ति कुसाङ लामा भरियाको रूपमा प्रयोग भएको पनि खुलेको छ।
प्रहरीका अनुसार, उक्त विदेशी मुद्रा अवैध सुन किनेर चीनतर्फ तस्करी गर्ने उद्देश्यले लगिएको हुनसक्ने आशंका गरिएको छ। अनुसन्धान जारी रहेको र थप विवरणहरू खुल्न सक्ने प्रहरीले बताएको छ।
