बर्दिया —
गुलरिया नगरपालिका वडा नं. ८ स्थित बाईपास रोडमा रहेको “पृथ्वी पार्क” मा सरसफाई कार्यक्रम सम्पन्न भएको छ ।
बंगलामुखी सामुदायिक सेवा केन्द्र बर्दिया, जय हरियाली अभियान, बास नेपाल तथा जिल्ला प्रहरी कार्यालय बर्दियाको संयुक्त आयाेजनामा सरसफाई कार्यक्रम सम्पन्न भएकाे हो ।
पृथ्वी विचारक अभियन्ता तथा जय हरियाली अभियान बर्दियाका कमल राज पाैडेल (देवकमल)ले वृक्षरोपण, सरसफाइ र हरियालीलाई प्राथमिकता दिएर पार्कको वातावरणीय महत्व बढाउन अभियानले निरन्तरता दिने बताउनुभयो ।
साेहि अवसरमा उहाँले केही दिन अगाडि राष्ट्रनिर्माता श्री ५ पृथ्वीनारायण शाहको सालिकमा तोडफोड गर्ने अराजक व्यक्तिहरुकाे पहिचान गरी अविलम्ब कार्यवाही गर्न जिल्ला प्रहरी कार्यालयलाई अनुराेध समेत गर्नुभयाे ।
अभियन्ता पौडेलले कार्यक्रममा सहभागी सबैलाई धन्यवाद दिँदै आगामी दिनमा पनि यस्ता जनहितकारी अभियानमा सक्रिय सहभागिता जनाउनु पर्नेमा जाेड दिनुभयाे ।
कार्यक्रममा बंगलामुखी सामुदायिक सेवा केन्द्र बर्दियाका अध्यक्ष अर्जुन पोखरेलले सो पार्कमा रहेको राष्ट्रनिर्माता श्री ५ पृथ्वीनारायण शाहको सालिक केही दिन अघि अराजक व्यक्तिहरूद्वारा तोडफोड गर्ने प्रयास गरिएको जानकारी गराउँदै, झाडीका कारण पार्कमा सहज आवतजावत नहुनाले ती अराजक व्यक्तिहरूले आउँदा दिनहरूमा पुनः यस्ता गतिविधि दोहोर्याउने सम्भावना रहेकोले पार्कको सरसफाइ र निगरानी आवश्यक रहेको धारणा राख्नुभयाे ।
उहाँले भन्नुभयो, पार्कलाई हराभरा र सफा राख्न सामूहिक प्रयास आवश्यक छ । पृथ्वी पार्क गुलरियाकाे एक मात्र पार्क भएकाले यसकाे संरक्षण गर्नु हाम्रो दायित्व हो । सरसफाइसँगै पार्कको सौन्दर्य अभिवृद्धिका लागि फोहोरमैला व्यवस्थापन, झाडी सफाई र प्लास्टिक संकलन गरिएकाे छ ।
कार्यक्रममा गुलरिया नगरपालिका वडा नं.८ का वडा अध्यक्ष धर्मेन्द्र कुमार बनिया, बास नेपाल बर्दियाका प्रतिनिधि, स्थानीयवासी, विभिन्न संघसंस्था प्रतिनिधि र सराेकारवाला लगायतको उल्लेखनीय सहभागिता रहेको थियो ।
