बाँके।
नेकपा माओवादी केन्द्रका अध्यक्ष पुष्पकमल दाहाल प्रचण्डले हालै सम्पन्न स्वतन्त्र विद्यार्थी युनियन (स्ववियु) निर्वाचनका नतिजालाई उत्साहजनक र सकारात्मक रूपमा मूल्यांकन गरेका छन्। उनले यो परिणामले माओवादी केन्द्रको पक्षमा सचेत र बौद्धिक युवा वर्गको समर्थन रहेको पुष्टि गरेको बताएका छन्।
बिहीबार बिहान सामाजिक सञ्जाल फेसबुकमा प्रचण्डले लेखेका छन्, “भर्खरै सम्पन्न स्वतन्त्र विद्यार्थी युनियनको निर्वाचनमा हाम्रो पार्टी निकट अखिल (क्रान्तिकारी) को पक्षमा देखिएको लहर निकै उत्साहजनक छ।” उनले थप जानकारी दिँदै भने, “कयौं क्याम्पसमा सत्ता गठबन्धनलाई समेत पराजित गर्दै देशभर प्राप्त नतिजाले भ्रष्टाचार र बेथितिका बिरुद्धको हाम्रो अभियानमा आजका सचेत एवं बौद्धिक युवा वर्गसँगको सशक्त एकता र समर्थनलाई प्रमाणित गरेको छ।”
पूर्वप्रधानमन्त्री प्रचण्डले स्ववियु निर्वाचनमा विजयी भएका सबै विद्यार्थीलाई बधाई र शुभकामना दिँदै, भविष्यमा युवाको नेतृत्व र सहयोगमा निरन्तर प्रगति र सुधारको दृषटिकोन राखेका छन्।
