रोशन काफ्ले इलाम। मङ्सिर ४।। इलामको माईजोगमाई गाउँपालिकाको केन्द्र नयाँबजारमा परम्परागत रुपमा लाग्दै आएको बालाचर्तुदशी मेला यो बर्ष पनि लाग्ने भएको छ ।
आगमी मंसिर ९ गते देखि मेला लाग्ने भएको हो । गाउँपालिकाको आयोजना र मेला व्यवस्थापन समितिको व्यवस्थापनमा बर्षेनी धार्मीक रुपमा लाग्दै आएको बालाचर्तुदशी मेला यो बर्ष पनि लाग्ने आयोजक समितिले आज पत्रकार सम्मेलन मार्फत जानकारी दिएको हो ।
बालाचतुर्दशीको दिन नयाँबजारमा अवस्थित शिवालय धाम , २०११ सालमा नयाँबजार बसाउन महत्त्वपूर्ण योगदान दिने सन्त श्री बालागुरुको प्रतिमाको दर्शन , उत्तरे पोखरिको दर्शन , आफ्ना पित्रीहरुको सम्झनामा सतबिँउ पलबिँउ छर्ने साथै भाकल पूरा गर्ने दर्शनार्थीहरुको बिहानै देखि भिड लाग्ने गरेको छ ।गाउँपालिकामा आन्तरिक तथा वाह्यय पर्यटक भित्राउने लक्ष्य सहित मेला आयोजना गर्न लागिएको गाउँपालिका अध्यक्ष कुश बहादुर थेवेले जानकारी दिए ।
गाउँपालिका भित्र पर्यटकीय संभावना बोकेका स्थान भए पनि प्रचार प्रसारको कमी भएकाले थप प्रचार प्रसार गर्ने उदेश्य रहेको गांउपालिका का उपाध्यक्ष प्रविना राईले जानकारी दिइन। मेला व्यवस्थापन समितिका संयोजक मदन भण्डारीका अनुसार मेला अवधिभर रमाईलो मिनी मेला , विभिन्न जातजातीका झाकी प्रर्दशन, सांस्कृतिक भेषभूषाको प्रर्दशन गरिने छ भने यहाँका रैथाने खानेकुरालाई प्रदर्शनमा समेत राखिने छ ।
माईजोगमाई गाउँपालिकाको थुम्के डाँडाबाट सूर्योदय , सूर्यास्तको दृश्यावलोकन गर्न सकिने ,उत्तरे पोखरी , मलु पोखरी, साततले झरना , शिवालय धाम, साङछयोलिङ बौद्ध गुम्का, महादेव थान मन्दिर, देवि मन्दिर माइबेनी शिवालय धाम , किरातहरुको प्रथम राजा यलम्बर , नेपालकै अग्लो गणेशको प्रतिमा , विश्वबाट लोपोन्मुख हाब्रे (रेड पाण्डा) साथै रेडपाण्डाको प्रतिमा लगायत पर्यटकका लागि आकर्षणका केन्द्र रहेको गाउँपालिका अध्यक्ष थेवेले बताए ।
पहिले बाटोको समस्या हुँदा पनि भरिभराउ लाग्ने मेला अहिले बाटो बनिसकेपछी झनै मेला लाग्ने मेला व्यवस्थापन समितिका सचिब महेश शापकोटाले बताए।इलामको चिनारी ७ वटा ‘ अ ‘अलैँची, आलु,अम्लिसो, अदुवा, ओलन , अकबरे र अर्थोडक्स चिया जस्ता कृषिजन्य बालिहरु उत्पादनमा अब्बल रहेको छ माईजोगमाई गाउँपालिका । यसै क्षेत्रमा नरिवल फल्ने देखि हिउँ खेल्ने सम्मको भु-भाग समेत रहेको छ ।
माई खोला र जोगमाई खोला बिचमा पर्छ माईजोगमाई गाउँपालिका ।साविकको प्याङ , जोगमाई , सोयाङ , नयाँबजार र नामसालिङ गाविसलाई समेटेर माईजोगमाई गाउँपालिका बनेको छ । माईजोगमाई गाउँपालिका भित्र ६ वटा वडाहरु रहेको छ ।यहाँ शेर्पा , राई , क्षेत्री , बाहुन , मगर , लोपोन्मुख लाप्चा , थामी पहरी जस्ता जातजातिको बसोबास रहेको छ ।
यो क्षेत्रको कुल जनसंख्या १९१३१ रहेको छ भने १५६.०१ वर्ग किलोमीटर क्षेत्रफल समेटेको छ माईजोगमाई गाउँपालिकाको । २०११ सालमा बालागुरुले बजार बसाए पछि बर्षेनी बालाचर्तुदशीका दिन यहाँ मेला लाग्दै आएको छ भने कोरोना लहरका बेला बन्द भएपछि गत सालबाट पुनः मेला लाग्दै आएको छ।
